(خصر مفتاح) بقلم الشاعر عادل العيساوي

(خصر مفتاح)

السفر انواع

صفناتي مراكب شوك00 وعيون الحبيب شراع

الجدم لمن يعوف عزاز

تنزل كصته لااخر طين00وتطول شبكته وي الكاع

ماخلالي واحد زين

الريل شكد اطلبه وجوه00 خلصت الحياة وداع

مليت وعشت مخنوك

وريتي معاشره الدخان ماشمت هوه النعناع

يجي اليل واظل حاير

من اول طفل للباكيت لااخر نعش للدخان

تااخذني جكارة ليل واظلن بالهوه مسافر

ابجي هواي

انوح هواي 00بس محد فهم نوحي

وين الكه بشر شفاف واحجيله وجع روحي

بشر مايسافر لشمات وكون من التفت الكاه

من امننه جوازي وجنطة اجروحي

يحسدوني التحبني هواي

مايدرون خلصت العمر غربه

اادور مالكيت انسان 

من يسولف على حسين شايل نية التربه

هاي الناس لاموناس

اجر ذاك اللطم والظيم يضيعونه على نزوة كاس

هواي من التشبهه اسماء

لكن بوفه العباس وين احضه

هاي الناس عدهه الفضل مثل الرسم فوك الماي 

ممكن يختفي بلحضه

غشاني سراب وجوه

وبقيت على الدرب معيوف00 وضباب مغطي تاليتي

وين الكه نهر للشوك واغسل بيه جرح نيتي

اوين الكه مكابر ليل تستوعب توابيتي

وك مليت اريد ارتاح

شلون ارتاح

وجم كاطع براسي يصيح00مامرتاح00 مارتاح

جبيره الصرخه البصدري

من اصيحن بالكهف شهرين00 بعد بيه مجال صياح 

خلص صبري وكرهت الروح وين احضه بوجه ذباح

بيه اسرار ماتنكال

وادور مالكيت انسان مثل البير 00شمامدو بصدره جفوف مايلاح

رايد واحد شكيله 00 رايد واحد اابجيله

حتلو طفل لاموعيب00سالفت القفل والباب معكوده بخصر مفتاح

عادل العيساوي

20\ 1\ 2015