صهيل عيون للشاعر عبد الله العبدلي
سجج وحشه وظلام الليل ويه الريل ماذيهه
وازف عيوني غبشه ويه النده من يطيح
وادك عين عله كل شباج
بلكي كبالي الكيهه
وارد بواهسي الخجلان
من شفت الشمس كسرت شكو بروحي فياي
وانزل فوك متن الكاع
وانطش طيش تاليهه
واجر روحي وصفير عظامي
جر الناي
انه بروحي عراضة طيف
مات وما يرد وياي
وبعد بيه
وبعد بيه
فراغ لجيتج وافزع صهيل عيون
فقير ومن يطكني شتاي
اتدفه بصور بالي
وحك عيونج الحبوات
حرت شلون افر حالي
اجيج مسابك بكل طيف
شايل بالحلم بستان
وافز والكاج ماهيه
وارد بوحشتي وخالي
وبعدني انكث صفار وبيه جم لوعه
عله الرجال صعبه هواي
من تنزل تره دموعه
وخذاني الروج
مدري لوين
بس شفت البعد بهواي اجمل
من كرب ليلي
انه بجرداخ بس من شفت بيت الطين
طايح
طاح كل حيلي
واحوك بكل تعابيرج
حياكة شوك
تره بلياج مر بيه الفصل صيهود
ماضلتي حته عثوك
مالت شوك
مو مالت توادعنه
تعاليلي
يمن بالروح
الج هوسات
مصارات باي حنه
تعاليلي ابمتن ليلج
سواد بلون ليل العايش بجنه
تعاليلي
اشتهيت الليل البشعرج
يصير بايدي مرجوحه
تعاليلي تره العاشك
نظرته هواي مفضوحه
تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المجلة وشكرا
تخبل
ردحذف