ياظلامك اشتهاء.... بقلم هشام شبر

ياظلامك اشتهاء.... بقلم هشام شبر

(امراة في سن الاربعين تجلس وسط الظلام داخل بقعة ضوء وهي تهذي عذابتها )
المراة :شجاج ماشفتي الوطن عميه روحي مفرفحه تريد حضنه ..ادور بالوطن عن نفسي واهلي امداهه الروح ماترسم وطن ليش ...( تمسك بجرائد وترميها واحده بعد الاخرى وهي تهذي ) خبر عاجل انه ومن قروني ردوا عله انفاسي ومزكوهه
خبر عاجل تشوغ عيون الاموات من تشتم عطر حروف ايتام ...

ياحبيبي شلون اشوفك وانت بعيوني مكابر تشتهي كل ساعه موت اتذكريتك من غفيت بثياب روحي وجلجلت احلامي ترجف هنا كعدنه هنا غيابك مراجيح الحزن يهتزني صوت ...

( ترتدي محرم صلاة )

انطيني صوتك خلي ارسم بي دعاء بلجي ينشف بحر خوفي بلجي اتوهم فرح وارسم لخطواتي زفة بيهه انت وبيهه انا وبيهه دنيه من حنان انطيني صوتك خل انام واحلم بروحي سفينه في بحر عينك حبيبي

(تحمل قطعة كفن )

من جفن صغت انا وجهك واستحيت مرة اضمك مره اشبكك بحضن روحي
ياوطن كافي ابتعادك تمرعدت روحي غياب ارد احبك حيل احبك واشتهيك
من اخذت احباب كلبي حضن ارضك سكيتك من دموعي حتى تنبت وجه هذا وجه ذاك

( تمسك بخيال وتبدء بالرقص )

شكد احب خبالك انت من يكون الجو ظلام انسحن كلي عليك من اشوف جروحك تناديني بسمي من اشوف الدنيا تتجالب عليك وينك انت ياحبيبي الشمس بيك انت اجمل والظلام يحتضن بيك الحمام مذبحات من الوريد ...

( تلولي بحزن وجنون )

دوريتك دوريتك ومالكيتك يامساحه بس فراغ تمسك بزيجان روحي وتعتهه حيل ياطيور اكرهت شباج حلمي وغردت ب موال ليل

( تمسك بخوذة جندي)

من هنا الجرح جان يصرخ تعال ضمني موت ضمني بحبال صوتك صرخه يحضنهه سكوت .. الحرب مابيهه لحظه كلهه ساعه ساعه موت

انا ام واخت انا وزوجه مليانه قصايد للجروح مات هذا ومات ذاك وتطشرت سنيني غربه واتطشرت انا عذاب ...

( تمسك ببندقيه)

هلهلي لوحدك فرح وانا اهلهل جدام فركه صوت منك مني صوت

( تهتف من خلال نافذه معلقه وسط المكان )

ياحديقه تفرهدت الورود منهه والعطر شك زيجه موت

( تقف في فتحة باب يتوسط المكان )

شلون ادخل هسه لو انتظر موتي كلي وكتي يمته حته روحي انعي ومثل مافاتوا افوت بي موت بكبرك انت بي موت ياوطن علك تصاوير الاحبهم على صدري حد خنكتي حد بجي يحتضن موت

(تتحرك كالمجنونه وهي تفرك راسها وجسدها كانها اصيبت بالجذام )

مرني طيف وخلي اشرب من عيونك المكان حتى اشعر بالوهم انا بأمان مرني طيف وشيلني ب تابوت فرحي مشتاق افرح من زمان مرني لو بالجذب مرني

( تهدء فجاه وتتحدث بهمس )

من شفت غدرك بجيت وتيهت بيبان عيني ومن جروحي تعبت وتالي غفيت

(تصرخ وهي باكيه )

ليش بس انت انت وطن مابي نقاط ليش من اسالك تبعد عالسراط والاماكن بيك عوجه كلهه عوجه يانزيز ياكل بروحي هضيمه ليش بس انت ليش

(تتحرك صوب قميص مرمي على الارض ترفعه وتحادثه )

هم قميص ويحمل اثار الغدر والذيب مات هم حضن يحضن حضن ويحلم بروحه عزيز وطيور تاكل من عمره بصورة غراب

امداي شكد غشيمه من حسبتك حضن امان بس اجيتك في اوان غير اوانك وانت ميت من زمان

حاولت بيك الحياة وشمرت روحي غطه عله عيونك وماردلك نظر واجهشت بانفاسي بيك وكالولي مات

ياوطن ردت حياة شبيك تستحي تنزع ثياب الموت يمي وتغتسل بماي الحياة

امداي شكد غشيمه امداي