باللهجة العراقية ( الدنيا ) .... بقلم احمد الكناني

باللهجة العراقية

( الدنيا )

..... الكناني .....

عاينتهن ..

وحدة وحدة ،

ذكرياتچ ترسن البوم الصور

ظل رجيف بچف سوالفنة ايتسامر

والدمع خضّر مواقف

عاندت صلب الحجر

گلبتهن ..

عاينت رسمة ضحچتچ

لو بده الليلو ابلظم خيط الستر

لا وحگ بوسة شفايفنه البريئة

بلبل مودّع غصن شجرة

و ترك نيشان غنوة

هدّلت عثگ التمر

ها يروحي ......

اشمالچ اتونين للعافچ عمر ,

مو ترس جيدچ حبل خيمة

او صفه المشدود گلبي

يعاين امن ابعيد چم دلّة وعثر !

سولفتهن ..

وغرفت طيبة بشليلي

مسودن ورضعان ترميه بحجر

بهيدة يلمالك نظر ..

الدنيا دولاب ابّحر ..

الدنيا غيمة بلا مطر ..

والعواذل

طشوا الليل اعله وجهي

وفگسوا عين الگمر

مو عجيبة الحية من تلدغ بشر

ولا عجيبة الخنجر ينام بخصر

بس عجيبة انسان توفيله بمحبتك

ينكر المعروف ويضيع الأثر ......