تلاگينـــه بقلم الشاعر بشير المرشدي

 …… تلاگينـــه ……

تلاگينـــه وضحك بوجوهنه المـاي

وغـدت بخدودنه اتطبي النواعيـر

وشمرنــه اغصانه وطشينه الافيـاي

وبقت بمتونه اتغني العصافيــر

تلاگينــه اوكعد بيناتنه الكيــــف 

وشرب بينه الهوه وخدرنه الانفاس

وغفـت بچفوفنه احضان المشاحيف

وندهنـه السالفه المافرعـت راس

ومشينه ويالمدى وعدينه الاحدود

وفردنه اجناحنه المافرع لريـــح

ونزلنه بديره ترفه اتفره اعيـون

وتلكانه الفراش ابرقته ايصيـــح

(هلا بريـع الطفوله الماركـــع راس)

(هلا بغصـن الترافه الشايل احـساس)

وشبچنــه اچفوفنه وخلينه الاطيور

تدگ النه بوتر وتفزز الحيــــل

وظفــرنه ازلوفنه وخلينه الازنــود

تذب انكابها وتتشيم بهيــــــــل

وحچينــه وخضرت بلسانه احـلام

ونثرنــه الدنيه من اعيونه افــراح

وسرينـــه وفرعت بمتونه اوراق

وعصر بينه الهوه ونكطنه قــداح

وغفينــه وي النجم وتطرز الليـل

ولمعنــه بليلة اثلاثين گمـــره

وحصدنه احلامنه وحنينه الاچفوف

وبيدرنـه الضحك بشفاف سمــره

وتغطينـــه ابرفيف انفاس الاغيوم

وعرگ بينه الهوه ودوخنه عطـــره

وحظنه الماي وتبدينه عالگــــاع

وترسنه الكاع بس اهروش خضـره

**********

 بشيرالمرشدي