ملگه الوداع بقلم الشاعر جواد الجابري

..ملگه الوداع..

نتلاگه بدمع ورموشي ترگص خوف

وينفخ ناي بيه بنغمة الفرگه

الجروح محزمه وتلطم لطم معدان

واصوات النواعي ترتل الحرگه

انا بحالة لقاء الملگه بيه وداع

بعيون المشابگ ماصخ الملگه

تلبس ثوب فرگه امن ارد اجيك بشوگ

وي الغير مالك تلبس الشبگه

 بحلگ وجه الموادع ناب يكسر ناب

 ويم لسان موتي معلگه الشرگه

 يوگع مستحاي بغصن گصتي عليك

بجويريد وجهي ولزمته العرگه

 اجيتك نفس يابس وانت ريتك سيل

 وگفت اباب ريتك طلعت مدنگه

 بچت عين الهوى المشيته دوم وياك

ضاگ الكون خنگه اتنفست خنگه

اداين ضحك من شفت الغمان

 بلكي تگول يضحك واخذ الشفگه

أمن اصيحلك يخايب صوتي گام يخون

 مثل چيله وتخون برگبة التفگه

صوتي اباب بيتك گمت اشده بخيط

تطلع ماتشوفه بجدمك اتسحگه

اوديلك ورد حسبالك انت اشموع

مامش نار عندك تركض تحرگه

درب الچان جدمك وي جدمي عليه

 اجاك يريد ترجع بيدك اطبگه

طيفك من يمر يركض يفوت بساع

عيني حزام شدت خاطر تلحگه

خرابة موت جسمي وبس طگيگ اعضام

 بيها اشباح سكنت من تطب تلگه

 ترى الخوف اطمأن يتونس ويه الروح

عگبك صار صاحب محد يزهگه

 جرحك حيل شيب وانت بعدك شاب

 عنده سنون طاحن بين بحلگه

 اشبر صار يوگف عني ملك الموت

 ناوي اليوم يمكن طاحت الورگه