تكدر تكتلني وترتاح بقلم الشاعر هاشم البهادلي
تكدر تكتلني وترتاح
كالو عنك سيفه ابجفه
وكالو مسموم وذباح
تكدر تكتلني وترتاح
انته اسلاحك مدفع روسي
ونه اكبالك دون اسلاح
تكدر تكتلني وترتاح
قفليت انته الفرحه ابكلبي
وعنك موجود المفتاح
ازرعت الليل اباخل كلبي
وبيدك طفيت المصباح
تكدر تكتلني وترتاح
مشعول النور ابنص بيتك
وبيتي ادور الاشباح
ملاج انت اعلى الصوبين
وشحيت المي عا الفلاح
تكدر تكتلني وترتاح
غركيت انه ابصفك كلش
لاكن طلعني التمساح
تكدر تكتلني وترتاح
ذب شصك حيل انتل روحي
وروحي اتعادل سبع ارواح
تكدر تكتلني وترتاح
ابميدانك صلت اول واحد
ودريبك انت الذباح
تكدر تذبحني وترتاح
المركب سار ابلا توجيه
وحسبتك انت الملاح
يالعايش عمرك بفراح
بس لالالا
لازم يوم ادور الدنيا
وتغادر انته وي الراح
وما يبقالك فد شي عدنه
وابقه انه القمر الوضاح
تكدر تكتلني وترتاح
تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المجلة وشكرا
0 التعليقات: