. وجع معسول ....بقلم الشاعرعبد الكريم القصاب
.......... وجع معسول .............
.................... عبد الكريم القصاب
................... 24 كانون الثاني 2016
يذاك آنتَ ، يل آكَبالي ،
يخابط ماي ، يا مدلول .
دوِّخني بطبع زيبك ،
وآحركَني بوجع معسول ،
وخذ جرّة نفس محروك ....
كحله لجفنك الناعس .
حتى آصفن على آعيونك وجه مذهول .
ولك ، يل مو على الخاطر ،...
وآحب آمرورتك بيّه .....
وأحب شتكَول .
لذيذه آمرورتك بيّه ،
عليها آيمطّك الواهس .
وبعد بيها طعم يجوي ،
وبعد بيها ،
وبعد ما كَول .
أخافن تبخل آعليَّ بوجع وآنساك .
الوجع وحده اليذكّرني بطواريّك ...
وظل مشغول .
أظل باليوجعنّي آمكيّف ومشغول .
بعد بيها طعم يجوي ...
وبعد بيها ،
وبعد ما كَول .
أخافن تضحك بوجهي وتطفّيني .
ونا منذور آظل بسوالفك مشعول .
أخاف آتغمّض عيونك الضحكه الحارّه ...
ورموشك آتهدني .
وآطيح وأبرد بسجّه ....
لعشك بارد تودّيني .
وآطلع من شرارك بالندى مغسول .
ولك يل مو على الخاطر ،
اِحركَني بوجع معسول ،
خلّيني أظل مشعول .
أحب جوياتك البيّه ،
وآحب كل زلّه تلجمني ،
وآحب شتكَول .
تنبيه : المرجوا عدم نسخ الموضوع بدون ذكر مصدره المرفق بالرابط المباشر للموضوع الأصلي وإسم المجلة وشكرا
0 التعليقات: