مجلة الوان أدبية

.... قصيدة صير قائد... 

چلب بذيل التطرف 

تنحسب عدهم مجاهد

وامشي بدروب الرعونه

تنحسب بالدوله قائد

هواي ناس تحبك بهيجي مشاهد

صير قائد.. 

كلشي يتوفر يدعمك

كل اذاعات التطرف والجرائد

كل شياطين الأنس تصنع مكائد

كلشي يتوفر يدعمك

 لاتفوره بيوم دمك.. خله بارد

خلي تصريحك حماسي

وكثر بكلمة مذاهب

راح تلكه الناس تتحول مقاعد

خلي واعظ

يكفر اباقي الطوائف

واشرح الجنه على كيفك

ولاتخلي الناس تستصعب رغيفك

اني اضمنك انت قائد

الغم الدستور بفخاخ ومصائد

حتى من تكبر جذبتك

الهوسه مالتهم الك خليها شاهد

ومحد يعاقب جنابك

باجر نحولك تقاعد

وروح سافر.. طير بجناح السعاده

واشتري لبت تركيا گلاده ومعاضد

شرطة انتربول ماتندل مكانك

وماكو قاضي يشكك بنية مجاهد

القاضي يتحول حصانك

صير قائد

عيش يومك

الشجره اذا تزرعها مايلحگ ثمرها

اكل يومك... اكل ناسك

ابني بأوربا لبنائك مدارس

هناك مستقبل عمرهم

هذا وارد.. 

غيب عن ناسك عمر وارجع عليهم

تلگه حبهم نفسه باقي

الهوسه محفوظه وتدرس

وكل ذبيحه لخطوه منك

شيل خشمك.. 

يتعب يگولون عنك

انطي من فلوسهم حفنة دراهم 

حاتم يگولون عنك

ماكو ثورة.. 

ماكو داعي تتعب الراس بأسمها

هواي ناس تضحي للدينار دمها

صير قائد

واترس وجوه الجرائد

هاي ناس تحب اليسيطر عليها

ينحسب عدهم مجاهد

كرار الركابي/ ذي قار