وين الگاك بقلم الشـــاعر عمــارالسراي

وين الگاك ...

يالمتعب اجدامي سنين 

چنت اهواك ...وين الگاك..

محتام ارد اشوفك 

ما امل طرواك..وين الگاك..

ترضاهه الي يتشمتون اعداك

وبلياك ..وين الكاك

يعافيتي ونسيم الروح

ما انساك ..وين الگاك..

خطوه بخطوه اعدهن 

هايم لملگاك ..وين الگاك..

يوحشني الظلام 

ويتحطم حلمنه العشته 

انه اوياك ..وين الگاك..

وإگضيت المساهر نار

بعد اجفاك ..وين الگاك..

ويتربع بروحي الظيم

من بلواك ..وين الگاك..

يبس شاطي الموادع

واني اترجاك..وين الگاك..

ياگطرة نده بخد الورد

معناك ..وين الگاك..

لا طيف اليمرني 

والجأ لذكراك ..وين الگاك..

تتناساني ليش 

وخذت كلشي اوياك ..وين الگاك..

نهك حيلي التعب 

 والعافيه بعيناك ..وين الگاك..

الشـــاعر عمــارالسراي.