من سحبت ايدك والمگاود خرب بقلم الشاعرعلي الميالي السماوي

من سحبت ايدك والمگاود خرب

وگبلي يا منجل مسح راس الگصب

أنسه بس العافيه اذكرني بيك

وسجد الشيطانك شمابيه رب

مره اگولن صاحبي ومرات اگول

انا الم النار وهاي هيه من الحطب

سنه فاتحتك براسي وبجي ذاك

وشما اصد الجادرك توه أنصب

امدح الغيمه من اشوف بگاعي طين

وصفه واذبحهه اعله قبلة كل عرب

طيحت الشلال شو ماي اعله ماي

ليش تزعل لو شفت نورس شرب

وليش تتوازه اعله بيبان القطار

وانته تدري بشمسك محليه الرطب

لا انته معلمني اكرهك حتى اعيش 

ولا گلت لغرابك افلان انصلب

وانه بيه اعله السفر جم سندباد

وخايف بضهري يگولون انغلب 

محسب وعالقفص ماجابرلي طير

حتى لو سألوني اگلهم هوه طب

جيل شيبي براسك أسود بس شگول 

اعرف الطاووس من ذيله الرغب

صيحني الشفه التذكرك تشتهيك

ودووووم لا تعطش بشر ما ينشرب

وليش تسأل هوه شو نفس الجواب

من سحبت ايدك والمگاود خرب